De Woch up Platt in MV: Pommern-Akten un Millionen för de Kultur
"Vertell-doch-mal"-Gala un Kultur-Millionen: De Nårichten ut Mäkelborg-Vörpommern von denn 16. bet tau denn 22. Juni 2025.
Kultur sall Demokratie up’t Land stark måken
Kulturinischativen in de Regionen üm Demmin, Gåd’busch un Griepswold warden mit je 1,5 Millionen Euro för taukåmen Projekten ünnerstütt. Dormit will de Bund Regionen up’t Land stark måken. De drei födderten Projekten will’n Minschen dörch Kultur-Angebote tausåmen bringen un Kinner un junge Lüd bäder in de Gesellschop inbinnen. „Allerland“ heit dit Födderprogramm, dat fief Johren lang löppt.
Sorch üm historisch’ Pommern-Akten
Historikers un Kommunålpolitikers in Vörpommern hebben Bang üm de historisch’ Pommern-Akten, wieldat de nich gaut lågert warden un wiel Facklüd in dat Lannesarchiv in Griepswold inspoort warden. Ierste Geschichts-Akten warden nu nå Schwerin bröcht. Dor sallen se so lang blieben, bet de Låger-Bedingungen in Griepswold bäder worden sünd.
Sperma-Klau in Löcknitz
Unbekannte hebben ut ein Zuchtbedrief in Löcknitz bi Påswalk Bullensperma stibitzt. Dat Ejakulåt hett ein’n Wiert von 30.000 Euro. Tügen hebben seihn, woans de Röwers dormit afhaucht sünd, säd de Polizei. De ermittelt nu wägen Klauen, Husfrädensbruch un Såkbeschädigung.
Handball: Empor Rostock trennt sik von Trainer Andersson
Nådem de HC Empor Rostock dat nich in de tweite Handball-Bunnesligå schafft hett, måkt hei Schluss mit de Tausåmenarbeit mit Trainer Nicolaj Andersson. Wecker nå em kümmt, steiht noch nich fast, heit dat von denn Verein. Andersson wier in’n März 2023 tau HC Empor kåmen.
"Vertell doch mal"-Gala in Hamborch
An’n Sünndach geiht „Vertell doch mal“, de plattdüütsche Geschichtenwettstriet von’n NDR, Radio Bremen un dat Ohnsorg-Theoter, tau Enn. Bi de traditschonelle Gala in dat Ohnsorg-Theoter in Hamborch warden de Priesdrägers verkünnt. Un dat Motto för dat nächst’ Johr ward verråden. Bi "Vertell doch mal" gifft dat Priesgeller von mihr as 5.000 Euro. Fief Geschichten warden utteikent’ – 25 in ein Bauk afdruckt’.
